प्राइममिनिस्‍टर थ्री नेशन्‍स कपको उपाधि नेपाललाई

उपाधिसाथ नेपाली टोली। तस्‍बिर स्रोत: रासस

काठमाडौं, १७ चैत।

नेपालले लाओसलाई पराजित गर्दै प्राइममिनिस्‍टर थ्री नेशन्स कपको उपाधि  हात पारेको छ। शुक्रबार दशरथ रंगशालामा भएको फाइनल खेलमा लाओसलाई १ का विरुद्ध २ गोलले पराजित गर्दै नेपालले घरेलु मैदानमा उपाधि चुमेको हो। 

नेपालका लागि आयुष घलान र मनिष डाँगीले गोल गरे। खेलको पहिलो हाफमा लाओसले अग्रता लिएको थियो। खेलको १७ औं मिनेटमा लाओसका तर्फबाट फौथाभोङ साङभिलेको गोलबाट लाओसले अग्रता लिएको थियो। ७ मिनेटपछि अर्थात् खेलको २४ मिनेटमा नेपालका तर्फबाट आयुषले गोल गरे। उनलाई एरिक विष्टले डी बक्समा पास मिलाएका थिए। खेल सकिन ३ मिनेट बाँकी छँदा नेपालले खेलमा अग्रता लिन सफल भयो। नेपालका लागि मनिषले डी बक्सबाट उत्कृष्ट फिनिशङ गरे।

नेपाल र लाओससहित भुटान सहभागी प्रतियोगिताको लिग चरणमा नेपाल शीर्ष स्थानमा र लाओस दोस्रो हुँदै फाइनल पुगेका थिए। लिग चरणमा नेपालले पहिलो खेलमा लाओसलाई २-० गोलले हराएको थियो। नेपालले दोस्रो खेलमा भुटानसँग १-१ गोलको बराबरी खेलेको थियो। त्यसअघि भुटानलाई लाओसले २-१ गोलले हराएको थियो।